O sastǎribo le korresro anda naśteră, and-o děs le savatosro.  

[1] The sar nakhlǎ o Jezuśis, dikhlǎ jegh manuś, korro de-kïnd kerdǐlǎ.  

[2] The Lesre ućeniki phućle Les, phenindo': Tonitovo, savo kerdǎ pekati: kado orj lesre parinți, ke kerdǐlǎ korro ?  

[3] O Jezuśis pale-phendǎ: Nić vo' na kerdǎ pekati, nić lesre parinți, de kaj te dithǒn ande lesθe le Dellesre butǎ.  

[4] Hin te keraw, źin kaj hin děs, o butǎ Kolesre kaj tradinǎ Man; 'ke avel e retǐ, kana kheźino n-aśtǐg kerel butǐ.  

[5] Kicom hom an lumă, Děs la lumăqro hom.  

[6] Phenindo' kala, ćungardǎ tele [p-e phuw] the kerdǎ ćik anda ćungar, the makhlǎ ćika' le korresre jakha.  

[7] The phendǎ lesqe: Źă the thow tut and-e skaldatoră Siloamuluj (kaj phenel pes: tradino). The gilǎ the thowdǎ pes the avilǎ pale the dikhelas.  

[8] The o većină the kola kaj dikhle' les maj angle ke has-lo korro phenenas: Na kado hin kodo kaj beśelas the kundulinelas ?  

[9] Uni phenenas: Vo' hin. Aver phenenas: Na-ni vo', numa măzinel le'. De kodo phenelas: Me hom.  

[10] The phenenas lesqe: Sar phutrile t'rre jakha ?  

[11] Kodo pale-phendǎ: O manuś kaj bićǒl Jezuśis kerdǎ ćik the makhlǎ morre jakha; the phendǎ manqe: Źă ka skaldatoră Siloamuluj the thow tut. The, gilǒm the thowdǒm man, the dikhlǒm.  

[12] Phende lesqe: Kaj hin Kodo ? The vo' phendǎ: Na źănav.  

[13] Jigine les k-o fariseji koles kaj has-lo korro varekana.  

[14] The has savatos and-o děs kaj o Jezuśis kerdǎ ćik the phutredǎ lesre jakha.  

[15] The paneś phućenas les the o fariseji sar dikhlǎ. The vo' phendǎ lenqe: Ćik ćunǎ pe morre jakha, the thowdǒm man the dikhaw.  

[16] The phenenas uni anda farisejă: Kado manuś na-ni kaθ-o Dell, 'ke na nǐkerel o savatos. The aver phenenas: Sar aśtǐg kerel jegh manuś pekatoson kise minunes ? The kerdǐlǎas rïka maśka lenθe.  

[17] The paneś phende le korresqe: De tu so phenes pa Lesθe, 'ke phutredǎ tirre jakha ? The vo' phendǎ ke hi-No prohorokos.  

[18] De o źidovă na patǎne pa lesθe ke has-lo korro the dikhlǎ, źin kaj na akharde le parințoren kolesre kaj dikhelas.  

[19] The phućle len, phenindo': Kado hin tumaro ćhăvo, pa savo phenen ke kerdǐlǎ korro ? The sar dikhel vo' akana ?  

[20] The pale-phende lesre parinți the phende: Źănas ke kado hin amaro ćhăvo the ke kerdilǎ korro.  

[21] De sar dikhel vo' akana, amen na źănas; orj kon phutredǎ lesre jakha, amen na źănas. Phućen les les; hi-no phuro; dumazinela kokoro pa pesθe.  

[22] Kala phende lesre parinți, 'ke daranas le źidovenθar. 'Ke o źidovă kidă phende' maśka penθe akana - ke dake varesavo phenela ke Vo' hin o Kristuśis, te avel arri ćudino anda khangiri.  

[23] Vaś kodă phende lesre parinți: Hi-no phuro; phućen les les.  

[24] The paneś akharde o dujto vari le manuśes kaj has-lo korro the phende lesqe: De slava le Dellesqe. Amen źănas ke Kado Manuś hi-no pekatoson.  

[25] The kodo pale-phendǎ: Dake hi-no pekatoson, na źănav. Jegh traba źănav: ke homas korro, de akana dikhav.  

[26] The phende lesqe: So kerdǎ tuqe ? Sar phutredǎ t'rre jakha ?  

[27] Pale-phendǎ lenqe: Akana phendǒm tumenqe the na xajarde ? Sosθar kamen te xajaren paneś ? Na kamen varesar te kerdǒn the tumen Lesre ućeniki ?  

[28] The atkozinde les the phende lesqe: Tu han Kolesro ućenikos, the amen ham le Mojsesre ućeniki.  

[29] Amen źănas ke o Dell le Mojse' dumazindǎ, the Kales na źănas Les kaθar hi-No.  

[30] Pale-phendǎ o manuś the phendǎ lenqe: Kjar ande kădă aćel e minună: ke tumen na źănen kaθar hi-No the Vo' phutredǎ morre jakha.  

[31] The amen źănas ke o Dell na xajarel le pekatosonen; de dake hin varekon kaj ćinstinel le Delles the kerel so kamel o Dell [lesθar], koles xajarel les.  

[32] Nićejekh'ar [anda phuranibo] na xajardǎ pes ke varekon phutredǎ jekhe korresre jakha, korro de-kïnd kerdǐlǎ.  

[33] Dake na avelas Kado kaθa o Dell n-aśtǐg kerelas kheć.  

[34] Pale-phende the phende lesqe: And-o pekati kerdǐlǎn să, the tu sikaves amen ? The ćudine les arri.  

[35] The xajardǎ o Jezuśis ke arri ćudine les. The, kana arakhlǎ les, phendǎ lesqe: Patǎs tu ande le Dellesro Ćhăvo ?  

[36] Pale-phendǎ the phendǎ: De kon hin, Răja, kaj te patǎv an Lesθe ?  

[37] The phendǎ o Jezuśis: The dikhlǎn Les ebe ! The Kodo kaj dumazinel tuva Kodo hin.  

[38] The vo' phendǎ: Patǎw, Răja. The imazindǎ pes Lesqe.  

[39] The phendǎ: Itilimasqe avilǒm ande kădă lumă, vaś kaj kola kaj na dikhen te dikhen, the kola kaj dikhen te aven korre.  

[40] The xajarde kala uni maśka farisejă, kaj has-le Lehă, the phende Lesqe: Vare the amen ham korre ?  

[41] O Jezuśis phendǎ lenqe: Dake avenas korre na avelas tumen pekatos. De akana phenen: Amen dikhas. Vaś kodă o pekatos aćel pe tumenθe.  

rromanes, rajikanes